Үндэсний цэцэрлэгт хүрээлэнгийн усан сангийн тогтоол усанд өнгөрсөн 2020 оны тавдугаар сарын 17-нд 8-12 насны дөрвөн хүүхэд живж, амиа алдсан харамсалтай хэрэг гарсан билээ. Уг хэргийн шүүх хурлын тов дөрвөн удаа хойшилсны эцэст өнөөдөр урьдчилсан хэлэлцүүлэг нь болж байгаа юм. Хэргийн хариуцагчаар ‘Хан Талст’ ХХК татагдаад буй. Амиа алдсан дөрвөн хүүхдийн ар гэрийнхэн өнөөдөр /2021.03.29/ хэвлэлийнхэнд хандан мэдээлэл хийлээ. Тэд ‘Хэрэг явдал болсноос хойш арван сарын хугацаа өнгөрсөн ч өнөөдрийг хүртэл хэрэг эцэслэн шийдвэрлэгдээгүй байна. Өмнө нь шүүх хурлыг товлох урьдчилсан хэлэлцүүлэг болсон ч дөрвөн удаа шүүхээс буцаагдсан. ‘Хан Талст’ ХХК-ийн зүгээс сэтгэл санааны хохиролыг барагдуулна гэх тайлбар өгсөн. Хүүхдүүдийн буяны ажилд тус бүр хоёр сая төгрөг бэлнээр өгсөн. Мөн шинэ жилийн өмнө гурван айлд хүнсний тусламж үзүүлж нэг, нэг сая төгрөг өгсөн. Хохирогчийн талаас ‘Хан Талст’ компанитай тохиролцсоны үндсэн дээр гурван өрх тус бүр 20 сая төгрөг нэхэмжилсэн. Гэвч 20 сая төгрөг өгөөгүй байгаа’ гэлээ.
