Төрөөс хэрэгжүүлж байгаа орон сууцны ипотекийн хөнгөлөлттэй зээлийг 2021 оны 7 сарын 1-ний өдөр хүртэлх хугацаанд үндсэн болон хүүгийн төлбөрийг зээлдэгчийн хүсэлтэд үндэслэн хойшлуулах, ингэхдээ үлдэгдэл төлбөрийн хэмжээг нэмэгдүүлэхгүйгээр зээлийн гэрээний хугацааг сунгах зохицуулалтын арга хэмжээг хэрэгжүүлэхийг ‘Монголбанк’-ны ерөнхийлөгч Б.Лхагвасүрэн, СЗХ-ны дарга Д.Баярсайхан нарт зөвлөмж болголоо. Хэрэгжүүлэх чиглэлд сангийн сайд анхаарал хандуулж ажиллана. Энэ ажлыг 2020 оны 11 сарын 1-ний өдрөөс хэрэгжүүлнэ. Үүнээс гадна банк болон ББСБ, Хадгаламж зээлийн хоршооноос иргэд, ААН-үүдэд олгосон зээлийн үндсэн болон хүүгийн төлбөрийг хойшлуулах хүсэлтийг шийдвэрлэхдээ нэмэгдүүлсэн хүү, торгууль, алданг ногдуулж, хүүг нэгтгэн тооцох зэргээр зээлдэгчид нэмэлт дарамт үүсгэхгүйгээр төлбөрийн чадварт нь нийцүүлэн гэрээний нөхцөлд өөрчлөлт оруулж, хугацаа сунгахтай холбоотой зохицуулалтын арга хэмжээг 2020 оны 11 сарын нэгнээс эхлүүлж, 2021 оны 7 сарын 1 хүртэл хэрэгжүүлэхийг Монголбанк, СЗХ-нд зөвлөмж болголоо. Эдгээр асуудлын хүрээнд засгийн газрын өнөөдрийн хуралдаанд Төвбанкны ерөнхийлөгчөөс эхлээд холбогдох хүмүүсийг оролцуулж, санал солилцож, хэрэгжүүлэх бүрэн боломжтой гэж шийдвэрлэсэн юм байна. Нэмэлт мэдээлэл болгон хүргэхэд өнөөдрийн байдлаар нэг сая 366 мянга орчим иргэн банкнаас 17 их наяд орчим төгрөгийн зээл авсан байдаг. Үүний 9,2 их наяд орчим нь хэрэглээний зээл байдаг юм байна.
