Монголын төдийгүй дэлхийн жүдо бөхийн шилдгүүдийн нэг, гавьяат тамирчин М.Уранцэцэг их спортоосоо зодог тайлаад удаагүй байгаа билээ. Өдгөө 32 настай түүний хувьд хэдийнэ холимог тулааны тамирчин болох эхлэлээ тавьсан.
Тэрбээр өдгөө АНУ дахь “JacksonWink” холимог тулааны клубт бэлтгэлээ базааж байна. Тус клубын мэдэгдэлд “Монголын тулааны урлагийн домог болон түүний баг манайд ирсэн нь нэр төрийн хэрэг” хэмээгээд “Түүний олон улсад үзүүлсэн амжилт үнэхээр гайхалтай. Харин тэр одоо холимог тулаан руу орж байна. Тэр бидэнтэй энд таван сарын турш бэлтгэл хийнэ. Түүнтэй мэдлэгээ хуваалцана гэхээс бид догдолж байна” гэжээ.
Дашрамд сонирхуулахад, UFC-д тулалдаж буй анхны монгол тулаанч Д.Батгэрэл “JacksonWink” клубт харьяалагдаж, бэлтгэл сургуулилалтаа хийдэг.
М.Уранцэцэгийн Америкт бэлтгэлээ хийж байх зуур жүдо бөхийн баг тамирчид Анталья хотыг зорив. Тус хотод дөрөвдүгээр 1-нээс 3-ны өдрүүдэд Их дуулгын тэмцээн болно.
Анталья Их дуулгад оролцох Монголын баг:
Эрэгтэйчүүд
- -60 кг – Э.Ариунболд, Б.Сүхбат
- -66 кг – Г.Хэрлэн, Ё.Басхүү
- -73 кг – О.Уранбаяр, Л.Анхзаяа
- -81 кг – Саид Моллаей, Б.Эрдэнэбаяр
- -100 кг – Г.Алтанбагана, Б.Гончигсүрэн
- +100 кг – О.Цэцэнцэнгэл, Э.Мөнхжаргал
Эмэгтэйчүүд
- -48 кг – Г.Наранцэцэг, Б.Баасанхүү
- -52 кг – Б.Хорлоодой
- -57 кг – Л.Энхрийлэн
- -70 кг – Ц.Энхчимэг
- +78 кг – А.Адъяасүрэн
Багийн дасгалжуулагчдаар П.Нямлхагва, М.Бундмаа нар ажиллаж байгаа аж.
