Болорсофт компаниас кирилл, монгол бичиг хооронд автоматаар чөлөөтэй хөрвүүлдэг Кимо программын нээлтийг өнөөдөр хийлээ.
Энэхүү хөрвүүлэгчийг хөгжүүлэхэд зургаан сар, хиймэл оюуныг хөгжүүлэхэд 10 гаруй жил зарцуулсан гэдгийг Болорсофт компанийг үүсгэн байгуулагч С.Бадрал тодотгов.
Тэрбээр хэлэхдээ, “2008 оноос хойш олон суурь технологийг хөгжүүлсээр ирсэн. Эдгээр судалгаа, технологийн үр шим болж энэхүү бүтээгдэхүүн төрж байна. Бид хүнийг орлох хэмжээнд хүрч чадахгүй ч гэсэн хүний ажлыг 50 хувь хийж чадах чадвартай бүтээгдэхүүнийг хийхийг зорьж буй юм. Энэхүү программ 2025 оноос төрийн албан хэргийг хос бичгээр хөтлөх зорилтын гол үндэс суурь нь болно гэдэгт итгэлтэй байна” гэв.
Энэхүү программ нь хэл шинжлэл, хиймэл оюун ухаанд суурилсан монголын анхны кириллээс монгол бичиг, монгол бичгээс кирилл бичиг рүү хөрвүүлэгч юм.
ШУА-ийн Ерөнхийлөгч Д.Рэгдэл хэлсэн үгэндээ хувийн компани санаачилга гарган өөрийн нөөцөө ашиглан ийм сайн бүтээл бүтээснийг цохон тэмдэглэж, сайшаан талархаж буйгаа илэрхийлсэн юм.
Тэрбээр, “Монгол хэлний тухай хуулийн заалт ёсоор монголчууд 2025 оноос төрийн албан бичгийг хоёр бичгээр хөтлөн явуулах үүрэг хүлээж байгаа. Хоёр бичгээр хэрхэн хөтлөн явуулах вэ гэдэг техник болон бодлогын шийдэл амаргүй. Хоёр бичгээр хөтлөн явуулахад Кимо хөрвүүлэг хамгийн гол шийдлийн нэг болно гэдэгт итгэлтэй байна” гэв.
Ташрамд дурдахад, тус компани хагас сая үгийн сантай “Болор толь”, анхны олон нийтэд хүлээн зөвшөөрөгдсөн үсгийн дүрмийн алдаа шалгуур “Болорспелл”, анхны машин сургалтад суурилсан бүрэн автомат мониторингийн систем “Кудос”, мэдээ ангилагч “Эдүгэ”-г хөгжүүлж, монгол яриаг бичвэрт, бичвэрийг ярианд хөрвүүлэгч “Чимэгэ” стартапын суурийг тавьсан юм.
