Саяхан 95 насныхаа ойг тэмдэглэсэн Италийн кино урлагийн домог Жина Лоллобрижида ирэх сард болох парламентын сонгуульд нэрээ дэвшүүлжээ.
Тэрбээр “Бүрэн Эрхт, Алдарт Итали” эвслээс бие дааж нэрээ дэвшүүлэхээр болсон байна. Алдарт жүжигчний нэрээ дэвшүүлж буй тойрог нь нийслэл Ром хотоос зүүн өмнө зүгт 70 км зайтай оршдог Латина хот ажээ.
Дээрх эвсэл нь Итали улсыг НАТО болон Европын Холбооноос гаргах зорилготой юм.
Ерөнхий сайд Марио Драгигийн тэргүүлдэг эрх баригч эвсэл задарсны дараа Итали улс есдүгээр сарын 25-ны өдөр парламентын ээлжит бус сонгуулиа товлоод байгаа.
Энэ удаагийн сонгуульд урьдчилсан байдлаар Жоржиа Мелонигийн Италийн Ахан дүүс, Маттео Салвинигийн Лига, ерөнхий сайд асан Силвио Берлусконигийн Форза Италиа намуудыг нэгтгэсэн баруун жигүүрийн эвсэл тэргүүлэх төлөв харагдаж байгаа юм.
Харин кино од Лоллобрижидагийн нэрийг дэвшүүлсэн эвсэл парламентад суудал авах 3 хувийн босгыг давах зорилготой
өрсөлдөж байна.
Нэрт жүжигчин эмэгтэй өмнө нь 1999 онд Европын парламентын суудлын төлөө өрсөлдөөд ялагдаж байжээ.
Лоллобрижида нь 1950-1960-аад оны үед Италийн кино урлагийн хамгийн өндөр үнэтэй жүжигчин байв. Тэрбээр оргил үедээ Шон Коннери, Хамфри Богарт зэрэг одуудтай хамтран дүр бүтээж байжээ. Сүүлд тэр гэрэл зургийн салбарт орж, жүжигчний замналаа өндөрлүүлсэн юм.
Эх сурвалж: Bloomberg
