Суссексийн гүн, гүнгийн ахайтан нар “Spotify” стриминг үйлчилгээний компанитай байгуулсан гэрээний дагуу хийсэн анхны подкастаа мягмар гарагт нийтэлжээ.
Хагас цаг үргэлжилсэн Харри, Меган нарын анхны подкаст нь баярын онцгой дугаар байсан юм. Энэ удаад тэд алдарт дуучин, хөгжмийн зохиолч Элтон Жонтой улиран одож буй оны талаар ярилцжээ.
“2020 он улиран одож, бид бүгд ирээдүйгээ харж байна. Иймд хуучин ондоо ямар сургамж авснаа санаж, бие биенээ халамжлах, харилцаа холбоотой байх нь бидний хувьд ямар чухал ач холбогдолтой байсныг эргэн дурсая” хэмээн хунтайж Харри цохон тэмдэглэжээ.
Харри, Меган Маркл нарын байгуулсан “Archewell Audio” дуу бичлэгийн компанитай олон жил хамтран ажиллах гэрээ байгуулсан тухайгаа “Spotify” стриминг үйлчилгээний компани 12 дугаар сарын 15-нд мэдэгдсэн юм. Гэрээний үнийн дүн 40.5 сая ам.доллароор үнэлэгдэж байна.
