ХӨСҮТ-ийн Тандалт судалгааны албаны дарга Ж.БАЙГАЛЬМАА:
-Өчигдөр /2021.03.22/ нийт 12.326 сорьцод шинжилгээ хийхэд 206 хүнээс Covid-19 илэрч, улсын хэмжээнд нийт батлагдсан тохиолдол 5392 боллоо. Сүүлийн 24 цагт 152 хүн эдгэлээ. Завхан аймгийн Шилүүстэй суманд дөрвөн хүн эдгэсэн. Шинээр бүртгэгдсэн 206 тохиолдлын 204 нь дотоодод бүртгэгдлээ. Үүнээс нийслэлд 191 тохиолдол бүртгэгдэж өвчлөл 4474 боллоо.
Сүүлийн 24 цагт Дархан-Уул аймагт долоо, Төв аймагт гурав, Увс аймагт хоёр, Хөвсгөл аймагт нэг тохиолдол тус тус бүртгэгдээд байна. Ингэснээр орон нутагт бүртгэгдсэн өвчлөл нийт 382 боллоо. Эдгээр тохиолдолд эмнэлгийн хоёр ажилтан багтаж байна.
Өнөөдрийн байдлаар нийт 1419 хүн эмчлүүлж байна. Нийт батлагдсан тохиолдлуудын дөрөв нь биеийн байдал нь хүнд байна. Улаанбаатарт хүн амын дунд Covid-19 халдвар тархсан нөхцөл байдалтай байна. Тиймээс хүн бүр нийгмийн харилцаагаа багасгах хэрэгтэй. Найз нөхдөөрөө цуглахгүй, айлд зочлохгүй байхыг зөвлөе.
