СХД-ийн 9-р хороонд ‘УЛААНБААТАР ХОТЫН НОГООН ОРОН СУУЦНЫ ТӨСӨЛ’ хэрэгжүүлнэ. Газрыг орон сууцаар солих төслийн хүрээнд 5.6 га талбайг чөлөөлж, дэд бүтцийг бүрэн шийдсэн. Тус байршилд 94 нэгж талбарын 280 өрх хамрагдаж газраа орон сууцаар сольж байрныхаа түлхүүрийг гардан авсан. Тус чөлөөлсөн талбарт ногоон орон сууцны хороолол байгуулагдах юм.
‘Улаанбаатар хотын Ногоон орон сууцны төсөл’ нь дэд төвүүдийг түшиглэн гэр хорооллын 100 га талбайд 10,000 айлын орлогод нийцсэн, ногоон орон сууцны эко-хорооллыг байгуулна. ‘НОГООН ОРОН СУУЦ’-ны онцлог нь эрчим хүчний хэмнэлттэй, нарны эрчим хүчний шийдэл, ухаалаг удирдлагын систем, усны хэмнэлтийн шийдэл, саарал усны ашиглалттай, иргэдийн оролцоонд суурилсан хог хаягдлын менежмент, ногоон байгууламж, цэцэрлэгт хүрээлэн, тусгай хэрэгцээт иргэдэд зориулсан төлөвлөлт, явган хүний болон дугуйн зам, хүүхдийн тоглоомын талбай гэх мэтчилэн иргэдийн ая тухтай эрүүл аюулгүй орчинд амьдрах бүхий л орчин нөхцөлийг бүрдүүлсэн байхаар төлөвлөгдсөн.
