Засгийн газрын гишүүд хэвлэлийнхнээр дамжуулж, олон нийтэд мэдээлэл өгч байна. Энэ үеэр Ерөнхий сайд У.Хүрэлсүх “Бид үхэх үү, сэхэх үү’ гэдэг хоёр сонголтын өмнө ирээд байна. Та бид улс орноороо нэг л замыг сонгосон. Энэ бол цар тахлаас хурдан ангижирч, бид амьдрах ёстой. Тийм учир хүн бүр эх орноо бодож чадвал энэ цаг үеийг хохирол багатай даван туулж чадна. Одоо бидэнд байгаа вакцин бол сахилга бат. Хэрвээ бид хариуцлагатай байж чадахгүй бол цаашид онц байдал зарлахаас өөр аргагүй нөхцөл байдал үүснэ. Ийм зүйл битгий гараасай гэж залбирч байна. Өнөөдрийн байдлаар 12 мянга орчим хүн цар тахлын голомтот ажиллаж байна. Гадаадын зарим улсад коронавирусийн халдварын үед зарим хүмүүс өргөсөн тангаргаасаа буцаж, ажиллаж чадахгүй гэдгээ илэрхийлж байсан удаатай. Өнөөдөр Монгол улсад ийм нөхцөл байдал үүсээгүй. Энэ 12 мянга орчим хүн ар гэр, үр хүүхдээ орхиод цар тахлын голомтот ажиллаж байгаа. Тийм учраас та нар минь хариуцлагатай, сахилга баттай байх хэрэгтэй гэж Ерөнхий сайд хэд хэдэн удаа анхааруулж, цэргийн хэллэгээр бол бактерлиогийн дайнд бид оролцож байгаа шүү гэлээ.
