Монголын эрүүл мэндийн ажилтны ҮЭ-ийн холбооноос “ЭРҮҮЛ МЭНДИЙН АЖИЛТНЫ ХӨДӨЛМӨРЛӨХ ЭРХ БА ҮЙЛДВЭРЧНИЙ ЭВЛЭЛ” сэдэвт ҮЭ-ийн хороодын дарга нарын улсын зөвлөгөөн”-ийг өнөөдөр зохион байгууллаа. Зөвлөгөөнд 21 аймаг, нийслэлийн шатлал бүрийн эрүүл мэндийн байгууллагын ҮЭ-ийн хороодын дарга, идэвхтэн сонгуультан 100 орчим хүн оролцлоо.
Зөвлөгөөний үеэр эрүүл мэндийн салбарын бодлого, эрх зүйн орчны шинэчлэл, “МҮЭХ-ны үйл ажиллагаа, хөгжлийн зорилт”, “Эрүүл мэндийн салбарын цалин хөлс, гүйцэтгэлийн санхүүжилтийн өнөөгийн байдал, цаашдын чиг хандлага”, “Эрүүл мэндийн салбарын ажилтнуудын хөдөлмөрлөх эрхийн өнөөгийн байдал”, “Эрүүл мэндийн ажилтны үүрэг, хөгжил”, “Багийн ажиллагааны стратеги” зэрэг олон асуудлаар илтгэл мэдээлэл сонсож, ҮЭ-ийн хороодын дарга нар эмч ажилтнуудын хөдөлмөрлөх эрх тулгамдаж байгаа асуудлуудаар хамтаараа шийдвэр гаргаж, Засгийн газарт шаардлага хаяглалаа. Учир нь эрүүл мэндийн салбарт ажлын цагийн менежмент, ядралын менежмент хэрэгждэггүйгээс хэт олон цагаар ажиллаж туйлдах, үүнийг дагалдан гарах алдаа эрсдэл нэмэгдэх, хамгаалах хэрэгсэл, нормын хувцас бүрэн хангагддаггүй, ихэнхи хувцас хэрэглэлээ өөрсдөө худалдан авдаг, амрах хоолох боломж муутай, хэт ачааллаас сэргийлэх, ажлаас халшрах хамшинж, ажил үүргээ гүйцэтгэсэнтэй холбоотой үүссэн биеийн болон сэтгэлзүйн гэмтэл өвчлөлийг илрүүлэх, эмчлэх, сувилах, нөхөн сэргээх зэрэг хуулинд заагдсан заалтууд огт хэрэгжихгүй байгааг тэд онцолж байв. мөн амь нас, эрүүл мэндийн эрсдлийн баталгаагүй, даатгалгүй нөхцөлд ажиллаж, ажил үүргээ гүйцэтгэж байгаад өвчилж хүндэрсэн, нас барсан ажилтнуудад хуулийн дагуу олгогдох 5 жилийн цалинтай тэнцэх тэтгэмж олгогдох эх үүсвэр тодорхойгүй байгаа талаар ч хөндөгдөж байсан юм.
