Даваа гарагт Энэтхэг улс Британийн колоничлолоос тусгаар тогтносныхоо 75 жилийн ойг өргөн дэлгэр тэмдэглэлээ.
Уг түүхэн ойг тохиолдуулан ард түмэндээ хандаж хэлсэн үгэндээ тус улсын ерөнхий сайд Нарендра Моди нэгэн чухал амлалтыг авсан байна.
Энэ бол Энэтхэг улсыг 25 жилийн дотор хөгжингүй орны ангилалд оруулах амлалт байв.
1.4 тэрбум хүн амынх нь багагүй хэсэг ядуу нөхцөлд амьдардаг Энэтхэг улс одоогоор олон улсын банк санхүүгийн байгууллагуудын тогтоосон стандартаар хөгжиж буй орны ангилалд багтдаг юм. Моди өчигдөр хэлсэн үгэндээ дэлхий нийтийн Энэтхэг улсыг харах өнцөг хурдтай өөрчлөгдөж байгаа, олон улсын асуудлуудыг шийдвэрлэхэд Энэтхэгийн оролцоо чухал болсон, гадаадын хөрөнгө оруулалт улс оронд нь тэрбум тэрбумаар цутгаж байгаа зэргийг бахархан ярьжээ.
80 минут үргэлжилсэн илтгэлдээ Моди байнгын сөргөлддөг хөршүүд болох Пакистан, Хятад улсуудтай харилцаагаа сайжруулах талаар ямар нэг үг унагаагүй юм.
Тэрбээр улс орных нь хөгжилд саад болж буй авлига, төрөл саднаа албан тушаалд томилох (непотизм) явдалтай тэмцэхээ амласан байна.
Эх сурвалж: Associated Pressa
