Засгийн газрын өнөөдрийн /2022.11.02/ өнөөдрийн хуралдаанаар Шүүхийн шийдвэр гүйцэтгэх eрөнхий газрын дарга Д.Загджавыг үүрэгт ажлаас нь чөлөөлж, цагдаагийн хурандаа О.Амарсанааг тус агeнтлагийн даргаар томилов. Д.Загджав нь 2020 оноос хойш тус газрын даргаар ажиллаж байсан.
Д.Загджавыг 2020 оны долдугаар сард Засгийн газрын хуралдаанаар ШШГЕГ-ын даргаар томилж байсан билээ. Хууль зүй, дотоод хэргийн сайд Х.Нямбаатарын тушаалаар ШШГЕГ-т шалгалт оруулсан байдаг. Учир нь, цагдан хорих газраас хоригдлууд оргох, хоригдож байсан хүн нас барсан, мөн шүүхийн шийдвэрийн ажилтан цагдаагийн алба хаагчийн биед халдсан гэх олон зөрчил гарсан тул түүнийг чөлөөлөх асуудал яригдаж байсан юм. Түүний оронд шинээр томилогдсон О.Амарсанаа нь 42 настай, эрх зүйч мэргэжилтэй. Цагдаагийн хурандаа, удирдахуйн ухааны магистр юм байна.
Тэгвэл өнөөдрийн Засгийн газрын хуралдаанаар хэлэлцсэн бас нэгэн томилгоо нь Гадаад харилцааны дэд сайд Б.Мөнхжинг үүрэгт ажлаас нь чөлөөлж, оронд нь “Монцамэ” агентлагийн захирлаар ажиллаж байсан Г.Амартүвшинг томилжээ. Г.Амартүвшин нь олон улсын харилцааны чиглэлээр мэргэшсэн бөгөөд Гадаад харилцааны яаманд 20 гаруй жил ажилласан. 2021 оноос Ерөнхийлөгчийн зөвлөхөөр ажиллаж байсан юм.
Засгийн газрын хуралдаанаар,
– “Эрдэнэс Тавантолгой” ХК-д тогтоосон онцгой дэглэмийн явц байдал, авч хэрэгжүүлсэн болон цаашид авч хэрэгжүүлэх арга хэмжээ,
– Хууль тогтоомжийн тухай хуульд нэмэлт, өөрчлөлт оруулах тухай болон дагалдах хуулийн төсөл,
– Нийтийн тээврийн талаар авч хэрэгжүүлэх зарим арга хэмжээ,
– Засгийн газрын авто бааз ТӨҮГ-т авах арга хэмжээ,
– 2023 оныг Монголд зочлох жил зарласантай холбогдуулан Аялал жуулчлалын Үндэсний хорооны ажлын алба байгуулах тухай зэрэг 21 асуудал хэлэлцэх болон танилцахаар төлөвлөөд байна.
