Монголын спортын корпорациас спорт холбоодтой хамтран зохион байгуулдаг Холбоодын нэгдсэн Улсын аварга шалгаруулах тэмцээн 2025 оны нэгдүгээр сарын 4-нд Мөсөнд авиралтаар эхэлнэ.
Дөрөв дэх удаагийн тэмцээн бадминтон, байт харваа, биллиард, буудлага, бүжгийн спорт, виртуал дугуй, жүдо, жюү жицү, кэндо, мөсөнд авиралт, орчин үеийн таван төрөлт, спорт авиралт, тэргэнцэртэй сэлэм, хүндийг өргөлт гэсэн 14 төрлөөр болох юм. Эдгээр тэмцээнийг Бөхийн өргөө, “Буянт-Ухаа” спортын ордон, “Хан Хиллс”, авиралтын заал, биллиард, мөсөнд авиралтын танхимд зохион байгуулна.
Энэ жилийн холбоодын УАШТ-д жүдо бөхийн холбоо нэгджээ. Жүдо, буудлага, хүндийг өргөлт, тэргэнцэртэй сэлэм зөвхөн насанд хүрэгчдийн ангилалд болох бол бусад 10 төрөл нь өсвөр, залуучууд, насанд хүрэгчид гэсэн гурван ангиллаар болно. Тэмцээний хуваарийг зургаар хүргэе.
