Зөвшөөрсөн салбарын ажилтан, албан хаагч, түүний гэр бүлийнхэн “Нэг хаалга-нэг шинжилгээ”-нд хамрагдсан бол хөл хорионы хугацаанд дахин PCR шинжилгээ өгөх шаардлагагүй талаар УОК-ын гишүүн, Засгийн газрын Хэвлэл мэдээлэлтэй харилцах хэлтсийн дарга Ц.Ганзориг өнөөдөр мэдээлэв.
Олон нийтийн дунд зөвшөөрсөн салбарынхан хөл хорионы үед ажилдаа явахдаа гурав хоног тутамд PCR шинжилгээ өгөх ёстой гэсэн ойлголтын зөрүү гараад буйг тэрээр мэдээлэлдээ онцлоод, өмнө нь голомттой бүс нутгаас иргэдээ татан авахдаа шинжилгээ 72 цагинй хугацаанд хүчинтэй байх шаардлага тавьж байсныг тодотгов.
Төрийн байгууллагын 5 хувь, хувийн байгууллага 15 хувь нь ажиллах шаардлага тавьснаар хөдөлгөөнийг 97 хувь хязгаарлаад буй. Тиймээс өрхийн нэг гишүүн нь PCR шинжилгээ өгсөн бол, тухайн хаяганд хамт амьдардаг гэдгээ нотолсноор зөвшөөрсөн 14 салбарынхан хөдөлгөөнд оролцох боломжтой. Өөрөөр хэлбэл, ажиллах квотдоо багтаж буй болон ажиллах цагийн хуваарийг илтгэсэн тодорхойлолт, ажлын үнэмлэх, иргэний үнэмлэхээр хөдөлгөөнд оролцоно гэдгийг Засгийн газрын Хэвлэл мэдээлэлтэй харилцах хэлтсийн дарга Ц.Ганзориг мэдээллийн үеэр тэмдэглэв. Мөн оршуулга, буяны ажилд оролцох хүмүүс дурын шигжилгээний цэгт хандах боломжтойг хэллээ.
Хөл хорионы үед иргэдтэй харьцах төрийн 808 байгууллагын 62 мянга гаруй албан хаагчийг энэ сарын 8-10-нд шинжилгээнд хамруулахад, бүгд сөрөг хариутай гарсан байна. Гадуур сул хөдөлгөөн байхгүй тул дахин PCR шинжилгээ дахин өгөх шаардлагагүй, мөн “Нэг хаалга-нэг шинжилгээ” арга хэмжээнд бүх нөөц боломжоо дайчилж байгаа тул гурав хоног тутамд иргэдээс шинжилгээ авах хүчин чадал байхгүйг хэллээ.
Ойлголтын зөрүү гаргахгүй байхын тулд УОК, НОК болон дүүргүүдийн Онцгой комисс өдөр бүр 16 цагт Төрийн ордонд өргөтгөсөн хуралдаан хийж байгааг мэдээллийн үеэр дурдав.
