УОК, Засгийн газраас энэ сарын 10-наас 25-ныг хүртэл хатуу хөл хорио тогтоогоод буй. Энэ хугацаанд халдварын тархалтыг бууруулж, хумиж авна гэсэн ч өдөрт бүртгэгдэх халдварын тоо 800-гаас буухгүй байгаа нь иргэдэд халдварын хумиж чадах уу гэх эргэлзээг төрүүлж байна.
Энэ асуудалд ХӨСҮТ-ийн дэд дарга Ж.Байгалмаа тайлбар өглөө. Тэрбээр “Хатуу хөл хориог ямар хугацаанд тогтоохоос үр дүн хамаарна. Бид эхний ээлжинд 15 хоногийн хугацаатай хөл хорио тогтоож байна. 15 хоногийн хугацаатай тогтоохдоо өвчлөлийн нөхцөл байдал тодорхой хэмжээгээр саарна. Халдварын нууц үеийн хугацаа 4-6 хоног байгаа. Тэгэхээр 4-6 хоногийн өмнө халдвар авсан хүмүүсийн халдвар өнөөдөр илэрч, бүртгэгдсээр байна.
Бид хөл хорионыхоо үр дүнг хараахан харах болоогүй. Ерөнхийдөө хөл хорио ямар хугацаагаар тогтоохоос хамаараад халдварын хэмжээг яаж бууруулах, эндэгдэлтийг нэлээн бууруулах нь хугацаанаас хамаардаг. Мөн бусад авч байгаа ч арга хэмжээ нөлөөлнө.
Эхний ээлжинд 15 хоногийн хугацаатай хөл хорио тогтоогоод дархлаажуулалтын явц 70 хувьтай байхад энэ өвчлөлийн тархалт ямар байх вэ гээд харахаар 15 хоногийн хөл хорионы дараа өдөрт бүртгэгдэх тохиолдлын тоо үл ялиг бууна. Тэгээд эргээд 15 хоногийн дараагаар өдөрт бүртгэгдэх халдварын тоо өсөхөөр харагдаж байна.
Гэтэл 28 хоногийн хугацаатайгаар хөл хорио тогтоогоод, дээрээс нь дархлаажуулалтын явцыг нэлээн үр дүнтэй яваад, дархлаа нь тогтчихсон иргэд 70 хувьтай байвал дэгдэлтийг маш их хэмжээгээр бууруулаад, долдугаар сарын 1-н гэхэд өдөрт бүртгэгдэх тохиолдлын тоо 10-аас доош орох тооцооллыг хийгээд байна.
