ЧӨЛӨӨТ БӨХИЙН ТАМИРЧИД ОЛИМПИЙН ХОЁР ЭРХ ХҮРТЭВ
Токио-2020 олимпийн наадмын бөхийн төрлүүдийн эрх олгох сүүлийн дэлхийн тэмцээн Болгарын нийслэл Софи хотод болж, Монгол Улсаас таван тамирчин өрсөлдлөө. Эрэгтэй дөрвөн тамирчин өрсөлдсөнөөс МУГТ Э.Бэхбаяр 57 кг-ын жинд мөнгөн медаль хүртэж, эх орондоо олимпийн эрх авчирлаа. Мөн эмэгтэйчүүдийн 62 кг-ын жинд Х.Болортуяа мөнгөн медаль хүртэж, олимпийн эрх хүртэв.
Ийнхүү Монголын эмэгтэй чөлөөт бөхийн тамирчид түүхэнд байгаагүй амжилт үзүүлж, ирэх зуны Токиогийн олимпийн наадамд бүрэн багаараа буюу зургаан жинд бүгдэд нь оролцохоор боллоо. Харин эрэгтэй чөлөөтэй бөхийн тамирчид 57 кг, 65 кг, 125 кг гэсэн гурван жинд оролцохоор болов.
Монгол Улс одоогоор чөлөөт бөхийн спортоор олимпийн есөн эрх аваад байна. Чөлөөт бөхийн олимпийн эрхийг тухайн тамирчинд бус холбоонд нь олгодог. Тэгэхээр дээрх тамирчид олимпод оролцох уу эсвэл өөр тамирчид оронд нь оролцох уу гэдгийг Монголын чөлөөт бөхийн холбоо шийднэ.
БОКСЫН ТАМИРЧИД ЧЕХЭД БАГИЙН ДҮНГЭЭР ТЭРГҮҮЛЭВ
Чехийн улсын Усти-над-Лабем хотноо зохион байгуулсан “Гран-При” олон улсын тэмцээнд Монголын боксын үндэсний шигшээ багийн тамирчид оролцож, хоёр алт, дөрвөн мөнгө, хоёр хүрэл медаль тус тус хүртэн багийн дүнгээр нэгдүгээр байрт шалгарав. Монголын зургаан тамирчин алтан медалийн төлөө шалгарч, эмэгтэй 57 кг-ын жинд О.Есүгэн, эрэгтэй 63 кг-ын жинд Э.Цэндбаатар нар алтан медаль хүртжээ.
Алтан медаль
- Эмэгтэй 57 кг – О.Есүгэн
- Эрэгтэй 63 кг – Э.Цэндбаатар
Мөнгөн медаль
- Эмэгтэй 51 кг – Л.Алтанцэцэг
- Эрэгтэй 52 кг – Х.Энхмандах
- Эрэгтэй 56 кг – Х.Энх-Амар
- Эрэгтэй 75 кг – О.Бямба-Эрдэнэ
Хүрэл медаль
- Эрэгтэй 64 кг – Б.Чинзориг
- Эрэгтэй 69 кг – Б.Мишээлт
Чехэд тэмцээнд оролцсон боксын баг тамирчид тавдугаар сарын 9-20-ны өдрүүдэд Герман улсад Герман-Кубын шигшээ багийн тамирчидтай хамтарсан бэлтгэл хийж, тавдугаар сарын 21-нээс зургадугаар сарын 1-ний өдрүүдэд АНЭУ-ын Дубай хотноо зохион байгуулагдах Азийн аваргад оролцох аж.
