БНХАУ-ын 33 иргэнийг албадан гаргалаа

Гадаадын иргэн, харьяатын газраас Гадаадын иргэний, эрх зүйн байдлын тухай хууль, Төрийн хяналт шалгалтын тухай хуулийн дагуу төлөвлөгөөт болон төлөвлөгөөт бус хяналт шалгалтыг тогтмол зохион байгуулж байна. Энэ удаад цаг үеийн нөхцөл байдалтай холбогдуулан 2 улс дипломат шугамаар хэлэлцэж, тохиролцсоны дагуу БНХАУ-ын 33 иргэнийг Зам-Үүдийн авто замын боомтоор албадан гаргаж, БНХАУ-ын талд хүлээлгэн өгөх ажиллагааг зохион байгууллаа.

Эдгээр иргэд нь шүүхээр ял шийтгүүлж, ялаа эдэлж дууссан 5, визийн хугацаа хэтрүүлсэн 3, оршин суух зөвшөөрлийн хугацаа хэтрүүлсэн 7, эрх бүхий байгууллагын зөвшөөрөлгүй хөдөлмөр эрхэлсэн 6, ирсэн зорилгоосоо өөр үйл ажиллагаа явуулсан зэрэг зөрчил гаргаvgy учраас албадан гаргалаа. Тухайлбал, визийн хугацаа хэтрүүлэн Монгол Улсад 15-16 жил хууль бусаар амьдарсан хоёр иргэн байсан бөгөөд тухайн иргэдийг хяналт шалгалтаар илрүүлсэн юм байна.

Дээрх иргэдэд Зөрчлийн тухай хуулийн 16.2 дугаар зүйлд заасны дагуу 12 сая 440 мянган төгрөгийн торгох шийтгэл ногдуулж, зөрчлөөс хамааран 1-3 жилийн хугацаанд Монгол Улсад дахин оруулахгүй байхаар хугацаа тогтоолоо. Нэмэлт мэдээлэл болгон хүргэхэд Монгол Улсын хууль тогтоомж зөрчсөн 17 улсын 145 иргэнийг он гарсаар албадан гаргаад байна.