Эрүүл мэндийн яамны албан ёсны фэйсбүүк хуудсаар өнөөдрөөс эхлэн 12-17 насны хүүхдүүдийн вакцинжуулалтыг түр зогсоож байгааг мэдэгдсэн.
Энэ талаар тус яамны хэвлэлийн ажилтантай холбогдож тодруулахад “12-17 насны хүүхдүүдэд Pfizer вакцины нэгдүгээр тунг хийхийг түр хойшлуулж байгаа. Давтан тунг хийх ажил үргэлжлээд явна. Товлосон хугацаанд хоёр дахь тунгаа хийлгээрэй” гэлээ.
Зургаадугаар сарын 16-наас нийслэлд 16-17 насны хүүхдүүд болон жирэмсэн эмэгтэйчүүд, хөхүүл эхчүүдийг вакцинд хамруулж эхэлсэн. Улмаар зургаадугаар сарын 28-наас 12-15 насныхныг Pfizer вакцинд хамруулж байгаа бөгөөд долдугаар сарын 5-ны байдлаар 132 мянга гаруй хүүхэд, 5.5 мянга орчим хөхүүл, жирэмсэн эмэгтэй вакцины эхний тунг хийлгэжээ. Вакцины эхний тунг хийлгэсэн 16-17 насны хүүхдүүд өчигдрөөс давтан тунгаа хийлгэж эхлээд байна.
