Цар тахлын улмаас Хятадын Эрээн хот хилээ тодорхойгүй хугацаагаар хаасан нь экспортын 80 хувийг авдаг Монгол Улсад хүнд цохилт болж байна. Гэтэл ОХУ хилээ хаах тухай мэдээлэл цацагдсан нь анхаарал татаад байгаа юм.
Оросын холбооны улсад энэ сарын 30-аас ирэх сарын 17 хүртэл амралтын өдөр болгох шийдвэр гарсан ч хилийн боомтуудын үйл ажиллагаанд нөлөөлөхгүй гэдгийг ОХУ-ын талаас мэдэгджээ.
Харин Монгол, Оросын хилээр зорчих иргэд хоёр улсын холбогдох байгууллагуудаас урьдчилан зөвшөөрөл авсны үндсэн дээр хил нэвтрэх юм. Ийм зохицуулалтаар “Алтанбулаг”, “Цагааннуур” боомтоор ачаа тээврийн хөдөлгөөн хэвийн үргэлжилж байгаа аж. Тухайлбал, өчигдөр /2021.10.26/”Алтанбулаг” боомтоор 80 тээврийн хэрэгсэл, “Цагааннуур” боомтоор 36 тээврийн хэрэгслийг нэвтрүүлсэн байна.
