Эрүүл мэндийн яамнаас олон нийтэд хандан Цагаан сарын баярыг гэр, гэртээ тэмдэглэх уриалгыг гаргасан.
Учир нь олон хүн цугларах нь КОВИД-19 тархах эрсдэлийг улам нэмэгдүүлж байгаа юм.
Тус яамнаас мэдээлснээр лабораторийн шинжилгээнд хамрагдаж буй гурван хүн тутмын нэг нь коронавируст халдвараар өвчилсөн нь батлагдаж байгаа аж. Мөн өвчилсөн хүмүүсийн 68.5 хувь нь гэр бүлийн гишүүдээсээ халдварлажээ.
Эрүүл мэндийн сайдын зөвлөх О.Батбаяр “Омикрон хувилбараар 12-оос доош насны хүүхдүүд шинж тэмдэггүйгээр хөнгөн өвдөж халдварыг эцэг эхчүүд, ахмад настнуудад тараах эрсдэл байгаа.
Иймд Цагаан сараар Омикроны шинэ хувилбар орж ирэх эрсдэлтэй байгаа төдийгүй 12-оос доош насны хүүхдүүд халдвар тараах эрсдэлтэй байгаа учраас баяраа гэр, гэртээ тэмдэглэхийг иргэдэд уриалж байна” хэмээн өмнө нь хэлж байв.
