АНУ-ын Ерөнхийлөгчөөр сонгогдоод буй Дональд Трамп шинэ засаг захиргааныхаа гол албан тушаалуудыг хаших хүмүүсийг мягмар гарагт үргэлжлүүлэн зарлалаа. Шинэ томилгоонд Израилд суух АНУ-ын Элчин сайд, Ойрх Дорнодын асуудал эрхэлсэн тусгай төлөөлөгч зэрэг багтсан байна.
Бүгд найрамдах намаас /БНН/ нэр дэвшиж сонгогдсон тэрбээр 2024 оны сонгуулийн кампанит ажлын үеэр өөрийг нь хамгийн их дэмжиж байсан ойрын туслахууд болон хамтран зүтгэгчдээ онцолжээ. Д.Трамп Тагнуулын төв газрын даргад Жон Рэтклиффийн нэрийг дэвшүүлсэн байна. Техас муж улсаас сонгогдсон Конгрессын гишүүн асан Ж.Рэтклифф нь Д.Трампын эхний бүрэн эрхийн хугацааны сүүлийн саруудад Үндэсний тагнуулын газрын даргаар ажиллаж байв.
“Жон манай улсын тагнуулын байгууллагын хамгийн өндөр хоёр албан тушаалыг хашсан анхны хүн болохыг би тэсэн ядан хүлээж байна” гэж Д.Трамп хэлээд, түүнийг “бүх америкчуудын Үндсэн хуулиар олгогдсон эрхийн төлөө эрэмгий тэмцэгч” гэж тодорхойлсон байна.
Арканзас муж улсын захирагч асан, БНН-ын хамгийн консерватив үзэлтнүүдийн нэг Майк Хакаби Израилд суух АНУ-ын Элчин сайдаар томилогдсон байна. Эвангелийн тууштай консерватив үзэлтэн тэрбээр Израилыг дэмждэг гэдгээрээ алдартай аж. Ерөнхийлөгчөөр сонгогдоод буй Д.Трамп АНУ-ын гадаад бодлогыг Израилын ашиг сонирхолд илүү ойртуулна гэж амлаад буй үед энэ томилгоог хийсэн байна. Д.Трамп түүнийг нэр дэвшүүлж буйгаа мэдэгдэхдээ, М.Хакаби “Ойрх Дорнодод энх тайвныг тогтоохын төлөө шаргуу ажиллах болно” гэжээ.
Харин Д.Трамп Ойрх Дорнод дахь тусгай төлөөлөгчөөр хуучны анд нөхөр, гольфын хамтрагч Стивен Виткоффыг томилжээ. Флоридагийн үл хөдлөх хөрөнгийн хөрөнгө оруулагч С.Виткофф одоогоор Трампын тангараг өргөх ёслолыг хариуцсан хорооны даргаар ажиллаж байгаа юм. Д.Трамп олон нийтийн сүлжээндээ бичихдээ “Стив энх тайвны төлөө цуцашгүй дуу хоолой болж, бид бүхний бахархлыг хүртэх болно” гэсэн байна.
Үүнээс гадна Илон Маск шинээр байгуулагдах “засгийн газрын үйл ажиллагааны үр дүнг хянах яам”-ыг удирдах үүрэг хүлээжээ. Тэрбумтан, бизнес эрхлэгч тэрбээр Ерөнхийлөгчийн сонгуульд БНН-аас нэр дэвшигч тодруулах сунгаанд өрсөлдөж байсан Вивек Рамасвамитай хамт тус яамыг удирдана гэж Д.Трамп мэдэгдсэн байна. Энэхүү яам нь “төрийн хүнд суртлыг арилгах”, зардлыг бууруулахын тулд засгийн газрын гаднаас зөвлөгөө, зааварчилгаа өгөх” ажээ.
Д.Трамп мөн Fox News сувгийн хөтлөгч, ахмад дайчин Пит Хегсетийг Батлан хамгаалахын сайдаар томилохоор шийдвэрлэсэн байна. Түүнчлэн Төрийн нарийн бичгийн даргаар Марко Рубиог томилохоор төлөвлөж байгааг талаар эх сурвалжууд мэдээлжээ. АНУ-ын бүх нийтийн сонгууль явагдсанаас долоо хоногийн дараах байдлаар, Бүгд найрамдах нам Сенатыг хяналтдаа аваад байгаагаас гадна Төлөөлөгчдийн танхимд олонх болоход ойрхон байна.
