МХЕГ-ын ЭМБСХГ-ын дарга С.Сүнчин ЭМЯ-ны хэвлэлийн хурлын үеэр цар тахлын улмаас бүх нийтийн бэлэн байдлын зэрэгт шилжсэн өнгөрсөн 11 дүгээр сарын 11-нээс өнөөдөр хүртэл хийсэн ажлаа танилцуулав.
МХЕГ өнгөрсөн хугацаанд 265 тусгаарлан ажиглах байранд хяналт шалгалт хийж, 484 зөрчил илрүүлсний 261-г нь газар дээр нь арилгуулж, аж ахуйн нэгж байгууллагад 14 шаардлага, 45 зөвлөмж хүргүүлжээ.
“Өчигдөр БЗД, Баянгол, Чингэлтэй дүүргийн нутаг дахь тусгаарлан ажиглах таван байранд коронавирусний халдвартай 17 тохиолдол батлагдсаныг ХӨСҮТ-д шилжүүлсний дараа ЗӨСҮТ-өөс голомтын эцсийн халдваргүйжүүлэлт хийхэд хяналт тавьсан”-ыг С.Сүнчин дурдлаа.
Түүнчлэн, эрүүл мэндийн 1247 байгууллагын бэлэн байдлыг хянаж, 1818 зөрчил илрүүлсний 880-г газар дээр нь арилгуулж, эмнэлгийн хог хаягдлын цуглуулга, тээвэрлэлт, устгалын заавар зөрчсөн 87, устгалын сав хүрэлцээгүй 56 зөрчлийг илрүүлэн арилгав. Нийт 88 албан шаардлага, 404 зөвлөмж хүргүүлэн, гүйцэтгэлд нь хяналт тавьжээ.
Коронаирусний шинжилгээ авах 694 түр цэгийг хянаж, 469 зөрчил илрүүлэн арга хэмжээ авч, 496 айл өрх, 759 худалдаа үйлчилгээний газар, 1035 албан байгууллага гээд нийт 2290 объектийн 1 198 744 мкв талбайд голомтын эцсийн халдваргүйжүүлэлт хийснийг хянасан байна.
Үйл ажиллагааг нь хязгаарласан сургалт, үзвэр үйлчилгээний 19 183 байгууллагыг шалгаад, 10 019 зөрчил илрүүлсний 7565-г газар дээр нь арилгууллаа. Худалдаа үйлчилгээний 27458 объектод хяналт шалгалт хийж бие засах, гар угаах нөхцөл бүрдүүлсэн байна.
Тэрбээр, “Нийт 8382 объектийн ахуйн хог хаягдлын цуглуулалт, тээвэрлэлт, устгалыг хянаж, ундны усны 850 эх үүсвэрийн аюулгүй байдлыг хянаж, 1993 дээжээс стандарт шаардлага хангаагүй 45-д нь дүгнэлт гаргаад байгаа”-г хэлэв.
Улсын хилээр нэвтэрсэн 50 608, хилээр гарсан 48 045 тээврийн хэрэгсэлд урьдчилан сэргийлэх болон эцсийн халдваргүйжүүлэлт хийж, хилээр нэвтэрсэн 51789, гарсан 50883 зорчигч, жолоочид эрүүл мэндийн хяналт тандалт хийжээ.
