Ерөнхий сайд Л.Оюун-Эрдэнэ ‘Оюутолгой’-н асуудлаар өнөөдөр (2021.12.13) мэдээлэл хийх юм байна. ‘Оюутолгой’-н 66 хувийг ‘Туркойз хилл’ ХХК, 34 хувийг ‘Эрдэнэс Оюутолгой’ ХХК эзэмшдэг. ‘Туркойз хилл’ ХХК-ийн дийлэнх хувьцааг ‘Рио Тинто’ эзэмшдэг. Засгийн газраас Монголын талын эзэмшиж буй 34 хувийн хувьцаанд ногдох зээл, зээлийн хүүг тэглэх саналыг хөрөнгө оруулагч “Рио Тинто” компанид тавьсан.
УИХ-ын 2019 оны 92 дугаар тогтоолоор ‘Рио Тинто’ компанитай байгуулсан хөрөнгө оруулалтын гэрээг засч сайжруулах, Монголд ашигтай хувилбарыг хөрөнгө оруулагчидтай тохирох саналыг боловсруулахыг Засгийн газарт үүрэг болгон, дээрх ажлын хэсгийг байгуулсан байдаг.
‘Turquoise Hill Resources’ компаниас далд уурхайн бүтээн байгуулалтын төслийг үргэлжлүүлэхэд 75 сая ам.долларын төсөв баталсан’ гэдгээ арваннэгдүгээр сарын 30-нд мэдэгдсэн. Уг төсвөөр 2022 оны нэгдүгээр сарын дунд үе хүртэл ‘Оюутолгой’-н далд уурхайн төслийг үргэлжлүүлэхэд хангалттай хүрэлцэх учиртай гэсэн билээ.
