Улаанбаатар метро төсөл хэрэгжүүлж, 17.7 км уртад 500 метрийн зайтай 42 цэгт газрын гадаргаас доош 30 метрийн гүнд босоо өрөмдлөг хийж дуусгажээ.
Өрөмдөхөөс өмнө усны судалгааг хийж, өрөмдлөгийн талбайд тусгай зөвшөөрөл бүхий монгол туслан гүйцэтгэх компани ажиллаж, зөвлөх үйлчилгээ үзүүлж буй “Духуа инженеринг” компанийн инженерүүд чанарын шаардлага, хяналт тавьжээ. Өрөмөхдөө 1.5 метр тутамд дээж авч, лабраторийн шинжилгээ хийснээр хурдас давхаргын хил зааг, тухайн хэсгийн ширхэглэлийн бүрэлдэхүүн, уян налархайн коэффициентийг тодорхойлжээ. Туннелийн нүх ухах машин нь урдаа араа шүдтэй, 1000 орчим тонн жинтэй, 200-300 метрийн урттай төхөөрөмж байх юм. Slurry shield TBM, Earth pressure balance TBM гэх хоёр төрлийн туннелийн нүх ухах машин бий.
Нийслэлийн хөрсний шинж чанар нь туннель барихад тохиромжтой гэж гарсан учир Earth pressure balance TBM буюу “Хөрсний даралтыг тэнцвэржүүлэн ухах туннелийн өрөмдлөгийн машин”-ыг сонгоод байна. Урьдчилсан байдлаар туннелийг 11 ширхэг машинаар богино хугацаанд ухаж дуусгахаар төлөвлөөд байгааг “Улаанбаатар хотын авто замын түгжрэлийг бууруулах нэгдсэн төсөл хэрэгжүүлэх нэгж”-ийн ахлах инженер Б.Содбаатар ярилаа.
Тэрбээр, “Өрөмдлөгийн машин нь ухах, сегментээр бэхлэх ажлыг давхар гүйцэтгэдэг давуу талтай. EPB TBM буюу хөрсний даралтыг тэнцвэржүүлж ухах, туннелийн өрөмдлөгийн машины урд хэсэг газрыг нүхэлж байхад гарсан шороог зөөх, бетон ханыг бэхлэх ажил ар араасаа хийгддэг. Туннелийн байгууламжийг агааржуулалтын, ус зайлуулах систем гэх мэт инженерийн байгууламжийн хоршил, иж бүрдэл гэж болно. Одоогоор туннелийг 7.3 метр диаметртэй хийхээр төлөвлөсөн. EPC гүйцэтгэгч шалгарсны дараа нарийвчилсан зураг төсөл боловсруулаад туннелийн диаметрийг шийднэ. Геотехник, тээврийн эрэлт гэх мэт олон судалгаа хийснээр эцсийн тайлангаа гаргана. ТЭЗҮ-ийн эцсийн тайланг 1 дүгээр сарын 20-нд бэлэн болгож, Барилгын хөгжлийн төв, Зам тээвэр хөгжлийн төвийн Шинжлэх ухаан, технологийн зөвлөлөөр хэлэлцүүлж санал, шүүмж авч магадлуулна. Хоёрдугаар сарын 4-нд тендэрийн II шатыг зарлах учир ирэх сарын 20-нд эцсийн тайлангаа гаргаад, 14 хоногт батлуулахаар төлөвлөсөн” хэмээв.
Метроны шугам 17.7 км урт, 14 өртөөтэй, өртөө хоорондын зай 1.3 км байх ба нэг депотой байна. Мөн 20 га талбайд засвар үйлчилгээний төв барина гэж төлөвлөснийг НЗДТГ-ын ХМОНХХ мэдээлжээ.
