Улаанбаатар хотын ногоон орон сууц төслийн эхний ээлжийн 110 айлын орон сууцыг ашиглалтад хүлээн авах үйл ажиллагаа өнөөдөр /2025.11.29/ Сонгинохайрхан дүүрэгт боллоо. Нээлтийн үйл ажиллагаанд Монгол Улсын Ерөнхий сайд Г.Занданшатар оролцов.Г.Занданшатар: “Улаанбаатар хотын утаа, түгжрэлийн шийдэл бол орон сууцжуулалт. Тиймээс Засгийн газраас орон сууцжуулалтын тухай хууль болон үндэсний төлөвлөгөө боловсруулах, орон сууцжуулалтын банк байгуулахаар бэлтгэл ажлыг эхлүүлсэн. Энэ хүрээнд Хот байгуулалт, барилга, орон сууцжуулалтын яамнаас дээрх ажлын хүрээнд холбогдох хуулийн төслүүдийг боловсруулж ойрын хугацаанд УИХ-д өргөн барихаар зэхэж байна”.
Уур амьсгалын ногоон сангийн буцалтгүй тусламж, Азийн хөгжлийн банкны хөнгөлөлттэй зээл, НЗДТГ-ын санхүүжилтээр хэрэгжүүлж буй уг төслийн хүрээнд дэд төвүүдийг түшиглэж 5000 айлыг ногоон орон сууцанд хамруулахаар төлөвлөжээ. Хоёр үе шаттай хэрэгжих төслийн эхний шатанд Баянхошуунд 462 айл, Шархадад 338 айлын ногоон орон сууц барих юм. Эхний ээлжийн орон сууцанд эмч, багш нарыг оруулахаар төлөвлөсөн байна. Таван жилийн өмнө Баянхошуу, Шархад орчмын 11 га газрыг чөлөөлөн орлогод нийцсэн ногоон орон сууц барих төслийг эхлүүлсэн байна. 2025- 2026 онд 800 айлын орон сууцыг барьж дуусгана. 2030 он хүртэл 4200 айлын орон сууцны хөтөлбөрийг үе шаттайгаар хэрэгжүүлэхээр төлөвлөжээ. Тус орон сууцанд саарал ус дахин ашиглах технологи нэвтрүүлсэн нь усны хэрэглээг 30 хувиар, барилгын дээвэрт нарнаас цэнэг хуримтлуулах хавтан суурилуулсан нь цахилгааныг 20 хүртэл хувиар хэмнэх боломжийг бүрдүүлсэн байна. Тухайлбал хэрэглэсэн усыг зоорийн давхарт шүүж, суултуурын ариутгах татуургын ус болгож дахин ашиглах технологи суурилуулсан байна. Нарны хавтангаар хуримтлуулсан эрчим хүчээр байрны гадна болон орцны гэрэл гээд орон сууцны дундын цахилгааны хэрэглээг хангах юм байна. Түүнчлэн уг ногоон орон сууц дөрвөн давхар ногооны хүлэмжтэй. Өрхийн хэрэглээний хүнсний ногоог жилийн дөрвөн улиралд тарьж ургуулах боломжтой юм байна. Мөн гал дэмждэггүй, шилний орцтой хөөсөн материалыг орон сууц барихад Монголд анх удаа ашиглажээ.
Discussion about this post