Өчигдөр өдөр хотын төв гудамж, нарны гүүр орчимд сансрын нисгэгчийн хувцастай хүн алхаж байгаа талаарх зураг бичлэг сошиал орчинд тархсан билээ. Хүмүүс энэ ямар учиртай болох? Хэн болох талаар ихээхэн асуулт дэвшүүлжээ. Гариг андуурсан байх, оюун санааны өөрчлөлттэй хүн байх, бас нэг уйдсан амьтан биз, од болж олны анхаарлыг татах гэсэн юм байлгүй… гэхчилэн олон сэтгэгдэл бичжээ. Харин бид энэ талаар тодруулав.
Сансрын нисгэгчийн хувцастай энэ хүн бол бүжигчин залуу аж. Удахгүй тоглогдох “Уран хас” контемпорари балетийн Хас-ын дүр болох шинийг санаачлагч, гайхалтай сэтгэгч залуугийн дүрийг энгийн олны дунд оруулж явуулан, олны хандлагыг харахыг хүссэн тухайгаа тэрээр хуучлав. Үеийн үед цаг үеэсээ түрүүлж төрсөн гайхалтай суут хүмүүс байсаар ирсэн. Галилео Галилей, Леонардо Да Винчи, Ван Гог, Вольфанг Амадей Моцарт, Эйнштейн гэх мэт… Тэднийг хүн төрөлхтөн ойлгон дэмжихээсээ илүү шоглон, гутаан доромжилж, эсвэл үгүйсгэн дарсаар ирсэн байдаг. Бидний өнөөгийн дүр төрх хандлага бол ердөө л энэ. Өөрөөсөө өөрөөр сэтгэж, өөрөөр харж, түрүүлж бүтээж байгаа нэгнээ хүлээн зөвшөөрч, чаддаггүй. Яагаад? Юуны учир? гэдгийг олж харах, мэдэхийг хүсэхээсээ түрүүнд шоолж инээж, дарж булахыг л хичээдэг болчихсон энэ үед шинийг эрэлхийлсэн залуу хүн хэрхэн ажиллаж амьдрах вэ? гэдэг хүнд сорилтонд орж байна. Тиймээс бид энэ уран бүтээлээрээ дамжуулан бидний дунд байгаа олон мянган гайхалтай мөрөөдөл бүхий дэвшилтэт үзэлтэй залуус, суут бүтээгчдээ ойлгож дэмжин, хамтдаа урагшлан хөгжихийн чухлыг уриалахыг хүсэж байна.
Монголчуудын сайн мэдэх “Уран” хэмээн олноо алдаршсан Хас хэмээх залуугийн тухай өгүүлэх сонгодог балетийг орчин цагт тохируулан сэдэв зохиол болоод хөгжим, бүжгийн найруулгийг нь шинэчлэн тавьж байгаа “Уран хас” бүжгэн жүжгийн уран бүтээлчид дүрийнхээ эрлийг зөвхөн тайзнаас эхэлсэнгүй. Олны дундаас, олны хандлагаас олж харахыг хичээсэн тухайгаа ийнхүү ярьж байна. Контемпорари балетийн хөгжилд өөрийн гэсэн нэр мөрөө үлдээхийг зорьж байгаа эдгээр залуус шинэ цагийн “Уран хас”-ыг ийнхүү бүтээж байгаа бөгөөд домогт Хас бол одоогийн бидний хувьд бол шинэ гариг “Марсын хүн” байжээ гэдгийг харуулахыг зорьсон гэв. Тэгвэл Марсын хүн гэж ямар хүнийг нэрлэх вэ? Бид шинэ гараг эрхэсийн эрэлд гарах боллоо. Харин өөрсдөө шинэ гаригийн эзэд болохдоо бэлэн байна уу? Энэ асуултын хариуг 6-р сарын 22,23-нд тоглогдох “Уран хас” контемпорари балетаас олж хараарай хэмээн уран бүтээлчид нь ярьж байна. Шинэ үеийн залуусын болзох цэг – Уран Хас контемпорари балет гэж тэд онцоллоо
