Коронавирусийн цар тахал дэгдсэн цагаас хойш анх удаагаа гадаад улсад айлчилж байгаа БНХАУ-ын дарга Ши Жиньпин өчигдөр Казахстаны нийслэлд хүрэлцэн очжээ.
Ши Жиньпинийг Казахстаны ерөнхийлөгч Касым-Жомарт Токаев нийслэл Нур-Султан хотын олон улсын нисэх буудалд тосон мэндчилж, дараа нь Акорда ордондоо хүлээн авч уулзсан байна.
Токаев энэ үеэр цар тахлын дараах анхны айлчлалаа Казахстанаас эхэлсэнд нь талархал илэрхийлж, хоёр улсын хооронд дипломат харилцаа тогтоосны 30 жилийн ойтой энэхүү үйл явдал давхцаж буйг онцолжээ.
“Өнгөрсөн хугацаанд бид улс хоорондын харилцаагаа бэхжүүлж чадлаа. Казахстан улсын эдийн засгийн хөгжил цэцэглэлт, манай олон улсын санал санаачилгыг дэмжиж ирсэнд би гүнээ талархаж байна” гэж Токаев хэлсэн байна.
Ши Жиньпин хариуд нь “Хятадын засгийн газар Казахстан улстай харилцах харилцаандаа онцгой ач холбогдол өгдөг. Олон улсын нөхцөл байдал хэрхэн өөрчлөгдөхөөс үл хамааран бид Казахстаны тусгаар тогтнол, газар нутгийн бүрэн бүтэн байдлыг болон одоо хэрэгжиж байгаа шинэчлэлтийг тууштай дэмжиж, дотоод хэрэгт нь хөндлөнгөөс оролцох гэсэн аливаа хүчийг эрс эсэргүүцэх болно” гэж хэлжээ.
Хятадын төрийн тэргүүн өнөөдөр Узбекистаны Самарканд хотыг зорьж, есдүгээр сарын 15-16-ны өдрүүдэд болох Шанхайн Хамтын Ажиллагааны Байгууллагын дээд хэмжээний уулзалтад оролцох юм.
Энэ үеэр Ши Жиньпин хоёрдугаар сарын 24-нд Украины дайн эхэлснээс хойш ОХУ-ын ерөнхийлөгч Владимир Путинтэй анх удаагаа уулзах төлөвлөгөөтэй байна.
