Амралтын өдрүүдэд Монголын Эрүүл мэндийн Ажилтны ҮЭХ-ны санаачлагаар Эрүүл мэндийн салбарынхан ‘Covid-19’ халдварын эсрэг ажиллаж байгаа салбарынхандаа дэмжлэг үзүүллээ. Аянд Улсын Хоёрдугаар төв эмнэлэг, П.Н.Шастины нэрэмжит Улсын Гуравдугаар төв эмнэлэг, ТТАХЭ, Дархан, Сэлэнгэ гэх мэт аймгуудын нэгдсэн эмнэлгийнхэн хамрагджээ.
Тухайлбал Улсын хоёрдугаар төв эмнэлгийн ҮЭХ, эмнэлгийн захиргаатайгаа хамтран хатуу хөл хорио тогтоосон эдгээр өдрүүдэд өргөсөн тангарагтаа үнэнчээр зүтгэж байгаа эмнэлгийн ажилчдаа халдвараас хамгаалах зорилгоор 530 ажилтнаа нүүрний хаалт болон амны хаалтаар хангаж, эмнэлгийнхээ ажилтан бүрийг 20 хоногийн витаминаар хангалаа. Мөн тусгаарлалт болон ковидын шинжилгээний объектуудад дайчлагдан ажиллаж байгаа ажилчиддаа зориулсан мэргэжлийн сургалтыг үе шаттай зохион байгуулж байна.Эмнэлэг халдварын эрсдэл өндөртэй бүс учраас ариутгал халдваргүйтгэл болон цэвэрлэгээ маш өндөр ач холбогдолтой тул үйлчилгээний ажилтнуудын ажлыг хөнгөвчлөх зорилгоор 10 ширхэг цэвэрлэгээний тэргэнцэр үйлчилгээний тасагтаа хандивлажээ.
Харин Улсын Гуравдугаар Төв Эмнэлгийнхэн эмч, сувилагч болон бусад ажилчдаа халдвараас хамгаалж, шүүлтүүртэй N95 амны хаалт, эмнэлэг дотор өмсөх бээлий, гар утсаа хийх Zipperтэй уут, эмнэлгийн бээлийн дотор өмсөх нэг удаагийн хүнсний бээлийг нийт 650 хүнд тараажээ.
