Өмнөд Солонгосын засгийн газар өчигдөр хүн амын өсөлтийг дэмжих бодлогын хүрээнд ирэх таван жилд хэрэгжүүлэх арга хэмжээнүүдээ танилцуулжээ.
Азийн дөрөв дэх том эдийн засагтай тус улсад сүүлийн арав гаруй жил хүүхэд төрөлт багасаж, хүн ам хөгшрөх үйл явц эрчимжиж байгаа юм.
Эхний ээлжинд засгийн газар 2022 оноос эхлэн нэг хүртэл насны хүүхдүүдэд сар бүр 300,000 воны ($275) тэтгэмж олгохоор болжээ. Тэтгэмжийн хэмжээ өссөөр 2025 онд 500,000 вон болох юм байна.
Одоогоор тус улсын долоо хүртэл насны хүүхдүүд сар бүр 100,000 воны тэтгэмж авдаг ба шинэ тэтгэмж нь үүнээс тусдаа хэрэгжих ажээ.
Үүнээс гадна 2022 оноос эхлэн шинээр хүүхэдтэй болох гэж байгаа эцэг эхчүүдэд 2 сая воны нэг удаагийн тэтгэмжийг бэлтгэл хангахад нь зориулан олгохоор болсон байна.
Хөл хүнд болсон эхчүүдэд одоо засгийн газраас баяр хүргэж, 600,000 вон нэг удаа олгодог бол 2022 оноос нэг сая вон болж нэмэгдэх гэнэ.
Үүнээс гадна шинэ эцэг эхчүүд хүүхдээ төрснөөс хойш гурван сар ажлаасаа чөлөө авах боломжтой ба энэ хугацаанд хоёул тус бүр сарын 3 сая воныг засгийн газраас авахаар болжээ.
Өмнөд Солонгосын засгийн газар 2006 оноос хойш төрөлтийг нэмэгдүүлэхийн тулд гурван цогц хөтөлбөр хэрэгжүүлэхдээ нийт 185 их наяд воны хөрөнгө зарцуулсан юм байна.
Гэсэн хэдий ч хүн амын дунд төрөлт багассаар 2019 онд нэг эмэгтэйд ноогдох төрөлтийн тоо 0.92 болсон нь түүхэн доод үзүүлэлт болжээ.
Өмнөх жил нь энэ үзүүлэлт 0.98 байсан нь анх удаа нэгээс доош унасан тохиолдол байв.
Тус улсын хүн амын тоог 51 саяд тогтмол хадгалахын тулд энэ үзүүлэлт 2.1 байх ёстой. 1970 онд уг үзүүлэлтийг засгийн газар анх удаа тооцоолж гаргахад 4.53 байжээ.
Yonhap News
