ОХУ-ын Бүгд найрамдах Буриад улсад өнгөрсөн 24 цагийн байдлаар “COVID-19”-ийн халдварын тохиолдол 134 хүнээр нэмэгдэж, тус улсад нийт батлагдсан халдвартай хүний тоо 26.537 болов. Үүнээс нийслэл Улаан-Үд хотод 49 хүн халдвар авч, батлагдсан коронавирусний халдварын тохиолдол 14.248 болоод байна. Эмчлэгдсэн нийт 23.748 хүн байгаагаас өчигдөр 1 дүгээр сарын 4-нд 119 хүн эмнэлгээс гарчээ. Харин халдварт өвчнөөр 1 хүн эндэж, нийт нас барсан хүний тоо 602 болоод байна. Буриадад өнгөрсөн 7 хоногт коронавирус илэрсэн нийт 26.403 хүн, үүнээс Улаан-Үд хотод 14.199 хүн халдвар авсан байв.
Буриад улсад өнгөрсөн 12 дугаар сарын 23-ны байдлаар коронавирусний халдварын нөхцөл ийм байв.
Ташрамд мэдээлэхэд, ОХУ өөрийн гаргаж авсан коронавирусний эсрэг үйлчлэх “Спутник” вакциныг өнгөрсөн 12 дугаар сараас иргэддээ хийж эхэлсэн. Одоогийн байдлаар энэ төрлийн 1.5 сая тун вакциныг бүс нутаг, мужуудад тараагаад байна. Түүнээс гадна коронавирусний вакцинд хамрагдсан иргэддээ цахим батламж олгох талаар тус улсын эрүүл мэндийн сайд мэдэгдэв. Тодруулбал, энэ оны 1 дүгээр сарын 1-нээс эхлэн ОХУ-ын иргэд цахимаар вакцин хийлгэснийг нотлох батламжийг цахим сайтаар хүлээн авах боломжтой болжээ.
ОХУ “Спутник” вакцины аюулгүй байдал, үр нөлөөг бататгахын тулд 10 гаруй мянган хүнээс шинжилгээ авч байна. Эрүүл мэндийн сайдынх нь мэдэгдсэнээр тус улсад эхний ээлжинд 800 гаруй мянган хүнийг вакцинд хамруулах юм. Улаан-Үд хот дахь Монгол Улсын ерөнхий консулын газар болон ОХУ-ын Буриад улсын “Байкал Дейли” сайтын эх сурвалжаар мэдээлж, “Риа Новости” агентлагийн зургийг ашиглав.
