Ираны эрх баригчид ойрын жилүүдэд нийт 5000 МВт-ын хүчин чадалтай нүүрсээр ажилладаг хэд хэдэн цахилгаан станц барихаар төлөвлөж байна.
Энэ нь өвлийн улиралд дулааны цахилгаан станцуудын хийн хангамж хязгаарлагддаг, мөн дулааны цахилгаан станцын түүхий эдийн багцыг төрөлжүүлэх шаардлагатай байгаатай холбоотой гэж тус улсын “Press TV” телевиз мэдээлжээ.
“Дулааны цахилгаан станцуудын эрчим хүчний эх үүсвэрийг төрөлжүүлж, улс орны, тэр дундаа Табас мужийн нүүрсний баялаг ордуудыг ашиглахын тулд бид 325 МВт-ын хүчин чадалтай хоёр блок бүхий цахилгаан станц барьж, 2024 онд ашиглалтад оруулахаар төлөвлөж байна. Эрчим хүчний Дээд зөвлөлийн удирдамжийн дагуу бид 2024 он гэхэд эрчим хүчний эх үүсвэрүүдийн хэрэглээг эргэн харж, төрөлжүүлж, нийт 5 мянган МВт-ын хүчин чадалтай, нүүрсний дулааны цахилгаан станц барих ёстой” гэж Ираны “Thermal Power Plants” компанийн тэргүүн Мохсен Тарзталаб тус телевизэд мэдээлсэн байна.
Түүний хэлснээр, нүүрсээр ажилладаг дулааны цахилгаан станцууд ашиглалтад орсноор 1.2 тэрбум шоо метр хийг экспортод гаргах боломжтой болно.
Ираны сэргээгдэх эрчим хүч, эрчим хүчний үр ашгийг дээшлүүлэх байгууллагын тэргүүн Махмуд Камани 10 мянган МВт эрчим хүч үйлдвэрлэх шинэ хүчин чадлыг бий болгохоор төлөвлөж байгаагаа өнгөрсөн долоо хоногт мэдэгджээ. Ираны Эрчим хүчний сайд асан Реза Ардаканяны хэлснээр, тус улс 60 мянган МВт цахилгаан үйлдвэрлэдэг бөгөөд үүний 50 мянган МВт-ыг нь дулааны цахилгаан станцууд, 10 мянган МВт-ыг нь сэргээгдэх эх үүсвэрээс үйлдвэрлэдэг байна.
