Хөвсгөл аймгийн Шуурхай штабын 35-р хуралдаан болж, 6 дугаар сарын 29-нөөс эхлэн зарим хязгаарлалтыг цуцалж энгийн горимд шилжүүллээ.
Тодруулбал маргаашаас эхлэн ресторан, цайны газар, барааны зах, барилгын дэлгүүр, үсчин, гоо сайхан, халуун усны үйлчилгээ зэрэг газрууд халдваргүйжүүлэлтийн дэглэмээ барьж энгийн горимоор ажиллаж эхэлнэ. Тус аймагт коронавируст халдварын өвчлөл буурахгүй байгаа учраас хот хоорондын зорчигч тээврийн үйлчилгээний хязгаарлалтыг 7 дугаар сарын 9-нийг хүртэл сунгалаа. Хүндэтгэх шалтгаантай буюу эрүүл мэнд, буяны ажилтай иргэд, хүнс, шатахуун, эм эмнэлгийн хэрэгсэл, барилгын материал, газар тариалантай холбоотой зорчих шаардлагатай иргэдийг аймгийн Шуурхай штабын зөвшөөрлөөр нэвтрүүлнэ.
Харин Мөрөнгөөс сумд хоорондох зам нээж байгаа боловч тухайн сум өөрсдөө коронавирусний халдвараас шалтгаалан дотоод зохион байгуулалт, хязгаарлалтын дэглэмээ өөрсдөө мөрдөж ажиллах боломжтой аж. Мөн архи, согтууруулах ундаагаар үйлчлэх, худалдан борлуулахыг хориглосон хугацааг ирэх сарын 9-ний өдрийг хүртэл сунгасан байна.
