МИАТ компанийн Москва-Улаанбаатар чиглэлийн ачаа тээврийн нислэгээр урд шөнө “Sputnik V” вакцин тээвэрлэн авчрав. Эх сурвалжийн мэдээлснээр, нийт 4 хайрцаг, 707 кг буюу 20000 тун “Sputnik V” вакцин ирсэн байна.
Түүнээс 10.000 тун нь Засгийн газрын хүсэлтийн дагуу ирж буй хоёр дахь ээлжийн вакцин бол 10000 тун нь хувийн хэвшлийн захиалга ажээ.
Манай улс өмнө нь ‘Астразенека’, ‘Синофарм’ компанийн ‘Вероселл’, ‘Спутник V’, Файзер зэрэг дөрвөн төрлийн вакцин хүлээн авсан. Тодруулбал,
Хоёрдугаар сарын 22-нд хүмүүнлэгийн шугамаар БНЭУ-ын Засгийн газраас “Астразенека” вакцины 150 мянган тун,
Хоёрдугаар сарын 22-ны өдөр Хятадын Засгийн газраас хүмүүнлэгийн шугамаар ‘Синофарм’-ын ‘Вероселл’ вакцины 300 мянган тун,
Хоёрдугаар сарын 27-ны өдөр арилжааны шугамаар ОХУ-аас ‘Спутник V’ вакцины 10 мянган тун,
Гуравдугаар сарын 12-ны өдөр олон улсын вакцин хангамжийн ‘Ковакс’ хөтөлбөрийн шугамаар ‘Астразенека’ вакцины 14400 тун,
Гуравдугаар сарын 24-ний өдөр уг хөтөлбөрийн шугамаар ‘Файзер’ вакцины 25740 тун,
Дөрөвдүгээр сарын 2-ны өдөр ‘Вероселл’ вакцины 300 мянган тунг арилжааны шугамаар,
Дөрөвдүгээр сарын 21-нд ‘Ковакс’ хөтөлбөрийн хүрээнд ‘Астразенека’-гийн вакцины 50400 тун,
Дөрөвдүгээр сарын 22-нд БНХАУ-аас нийт 600 мянган тун “Вероселл” вакциныг тус тус хүлээн авсан юм.
