Б.Жавхлан: Хоёр их наядын зээлийн санхүүжилтээс 20%-ийг нь гаргахад 5,900 зээлдэгч авсан байна

УИХ-ын гишүүн Д.Сарангэрэл: Хоёр тун вакцин хийлгээд дархлаа тогтосныг яаж тогтоож байгаа вэ.

Эрүүл мэндийн сайд С.Энхболд: Энэ асуудал дээр судалгааны баг ажиллаж байгаа. Судалгааны багийнхан нэгдүгээр тун хийлгэсэн, хийлгэхээс өмнөх хүмүүсээс шинжилгээ авсан. Эсрэг бие үзээд хэр түвшинд байгаагаар нь дархлалын зэргийг тогтоож байгаа. Тодорхой үр дүн гарахаар мэдээлэл өгөх болно.

УИХ-ын гишүүн М.Оюунчимэг: Гурван хувийн хүүтэй зээл эзэддээ очиж чадаж байгаа юу?

Сангийн сайд Б.Жавхлан: Ажлын байрыг хамгаалах зээлд 5,900 зээлдэгч хамрагдсан. Үүнд 875 ААН, 5,025 иргэн зээлэнд хамрагдаад байна. Хоёр их наядаас 20 хувь нь гарахад 5,900 зээлдэгч авсан байна. Өмнөх алдаагаа давтахгүйн тулд хяналтыг сайжруулсан. Яг бизнес эрхэлдэг, баялаг бүтээдэг хүмүүст нь зээлийг хүргэх ёстой. Үүнд иргэдийн болон холбогдох байгууллагууд хяналт тавьж явна.

ЗГХЭГ-ын дарга Ц.Нямдорж: 2020 оны дөрөвдүгээр сард батлагдсан Ковидын үеийн хуульд Засгийн газар орлогыг хамгаалах арга хэмжээ авах эрхтэй, жилийн төсвийн зарлагыг нэмэгдүүлэхгүйгээр төсвийн зохицуулалт хийх эрхтэй, цалин орлого нь тасарсан иргэдэд санхүүгийн дэмжлэг үзүүлэх эрхтэй гэж заасан. Иргэдэд 300 мянган төгрөг олгож байгаа нь хуулийн дээрх заалтын хүрээнд гаргасан шийдвэр.

Эрдэнэт үйлдвэр цар тахлын эхний үеийн хүндрэлийг авч гарсан. 650 тэрбум төгрөгийг гэрэл, дулааны зардалд зарцуулсан. Нийт дүнгээрээ 760-аад тэрбум төгрөгийг Эрдэнэт үйлдвэрийн өнгөрсөн жилийн орлогоос цар тахлыг давж гарах арга хэмжээнд зарцуулсан.

Оюутолгойг зогсооно, зогсоохгүй гэж өнгөрсөн жилээс ярьж эхэлсэн. Зогсоогоогүй учраас энэ удаад их наяд гаруй төгрөгөөр иргэдэд дэмжлэг олгож байна.

Вакцины тухайд сайн, муу гэдэг яриа огт байж болохгүй. Гурван янзын вакциныг аль алийг нь хэрэглэж байна. Гадна талд тэр нь муу, энэ нь сайн гэсэн захиалгат явуулга явж байгаа. Үүнд автаж сайн, муу гэж ярих нь зохисгүй. Би гэхэд оросын вакцин хийлгэсэн. Өчигдөр хоёр дахь тунг нь хийлгэлээ. Яах ч үгүй байна.

Эрүүл мэндийн сайд С.Энхболд: Халдварын тохиолдол өдрөөс өдөрт нэмэгдэж байгаа. Өнөөдөр гэхэд 714 тохиолдол батлагдсан байна. Халдварын тоо өсөх тусам эрүүл мэндийн салбарын ачаалал ихэсэж байна. Үүнийг дагаад хүнд, хүндэвтэр хүний тоо нэмэгдэж байгаа. Үүнтэй холбоотойгоор эрчимт эмчилгээний тасагт эмчлүүлэх хүний тоо өсөж эмнэлгийн ачаалал нэмэгдэж байна.

Өнөөдрийн байдаар вакцинд хамрагдах ёстой нийт хүн амынхаа 25 хувийг дархлаажуулалтад хамруулаад байна.

Эхний тун хийлгэсэн хүмүүс халдвар авах эрсдэл өндөр байгаа учир хөл хориог халдвараас сэргийлэх нэг арга хэмжээ гэж үзэж байгаа.

УИХ-ын гишүүн Д.Ганбат: Коронавирус орж ирээд бараг хоёр жил болчихлоо.

Засгийн газар 10 их наядын төлөвлөгөө гаргаад ажиллаж байгаан байна. Гэвч гаргаж байгаа мөнгө хийж байгаа ажлыг нь харьцуулаад харахад их муу байна.

Өчигдөр Засгийн газраас 14 хоногийн хөл хорио тогтоож, хүн бүрт 300 мянган төгрөг өгөхөөр болж. Энэ зөв алхам. Үүнийг эрт хэрэгжүүлэх байсан юм.

Сангийн сайд Б.Жавхлан: Дэлхий нийтээрээ бид хүнд сорилтод байна. Өнгөрсөн хугацаанд 10 сар дотооддоо халдвар алдаагүй барьж чадсан. Хэрэв барьж чадаагүй бол вакцинтай золгож чадахгүй маш хүн байдалд орох байсан.

Зорилтот 60 хувьд хангалттай хүрэх хоёр тун вакцины гэрээг хийж чадсан.

Өчигдөр Засгийн газар ирэх 14 хоногийн төлөвлөгөөгөө танилцуулсан. Өнгөрсөн хугацаанд хийсэн вакцинжуулалтаа үр дүнтэй болгохын тулд ийм арга хэмжээ авсан.

Үе үеийн Засгийн газрууд үр дүнтэй ажилласны дүнд сүүлийн сар гаруйн хугацаанд 1.2 гаруй их наядын орлого Оюутолгойгоос орж ирлээ.