Шинэ улирлын хичээлийг бүрэн танхимаар нээх эсэх асуудлыг өнөөдрийн хуралдаанаар хэлэлцсэн байна. Улмаар Ерөнхий сайд ЭМЯ, БШУ, УОК-ийг саналаа нэгтгэж, шийдвэр гаргах долоо хоногийн хугацаа өгсөн талаар Ерөнхий сайдын хэвлэлийн төлөөлөгч Ч.Болортуяа мэдээлсэн. Уг хэвлэлийн хурлын дараа Эрүүл мэндийн сайд С.Энхболд сэтгүүлчдийн асуултанд хариулах үеэрээ хичээл, сургуулийг хэзээ эхлүүлэх талаар мэдээлэл өглөө.
Тэрээр “Хичээл, сургалтын байгууллагын үйл ажиллагааг хэрхэн эсэхийг ирэх долоо хоногийн Засгийн газрын хуралдаанаар шийднэ. Эрүүл мэндийн яам хөл хорио тавих санал тавиагүй байна. Гэхдээ нөхцөл байдал ямар байхаас шалтгаална. Өнөөдөр Ерөнхий сайд 14 хоног цахимаар хичээллэх санал гаргасан” гэв.
